பெரியதம்பி சுப்பிரமணியம் (மணியம் )

• பிறப்பு – 21.09.1923 – இறப்பு 15.03.2006 நல்லூர், யாழ்ப்பாணம்.
• தமிழ் மக்களிடையே ஓவியம் பற்றிய வெகுசன எதிர்பார்ப்பின் ஓர் வடிவமாக இவரது ஓவியங்கள் காணப்படுகின்றன.
• யாழ்ப்பாணத்தில் வாழ்ந்த மிகப் பிரசித்தி பெற்ற ஓவியராவார்.
• சுயமாக ஓவியக்கலையைக் கற்றுக் கொண்டார்.
• ரவிவர்மாவின் புராண இதிகாச ஓவியங்களின் தொடர்ச்சியான இந்திய வெகுசன காட்சிப் பண்பாட்டின் வெளிப்பாடுகளான சினிமாப் படங்கள், கலண்டர் படங்கள், சுவரொட்டிகள் என்பவற்றினூடு பரவலான தெய்வப் படங்களின் செல்வாக்குகள் காணப்படுகின்றன.
• இப்படங்களில் மாயவாத (illusionistic) வெளிப்பாட்டு முறையில் தெய்வ விக்கிரகப் படங்களும், புராண இதிகாச சம்பவங்களும் உள்ளடக்கமாகக் கையாளப்பட்டுள்ளன.
• கோயில் சுவர்களிலும், திரைச்சீலைகளிலும் வரைந்துள்ளார். அதேவேளை பதாதைகளையும் வெட்டுருக்களையும் (Cut out) மிகப் பிரமாண்டமான அளவில் வரைந்துள்ளார்.

இவரது கோவில் ஓவியங்கள், திரைச்சேலைகள் காணப்படும் இடங்களில்

♦ நல்லூர் – கைலாச பிள்ளையார் கோவில்
♦ இணுவில் – பரராசசேகர பிள்ளையார் கோவில்
♦ சுதுமலை – அம்மன் கோவில்
♦ வல்வெட்டித்துறை – சிவன், அம்மன் கோவில்
♦ நல்லூர் – வீரமாகாளி அம்மன் கோவில்
♦ வேலணை – அம்மன் கோவில்
என்பன குறிப்பிடத்தக்கவையாகும்.

அகத்தியரும் விநாயகரும்

• இவரது சிறந்த ஓவியங்களில் ஒன்றான அகத்தியரும் விநாயகரும் ஓவியமானது இணுவில் பரராசசேகரப் பிள்ளையார் கோவிலிற்குரியது.
• அகத்தியரின் கமண்டலத்தினைக் காகமாக வந்த விநாயகர் தட்டியதால் காவிரி ஆறு தோன்றும் கதை மூன்று தொடர் காட்சிகளாக சித்திரிக்கப்பட்டுள்ளது.
• இது ரவிவர்மாவின் சாயலுடைய மாயவாத உத்தி முறையில் வெளிப்படுத்தப்பட்டுள்ளது.
• சுண்ணாம்பு சுவரின் மீது தளத் தயாரிப்புக்கள் எதுவுமற்று எனாமல் வர்ணத்தால் ஓவியம் தீட்டப்பட்டுள்ளது.
• தூரதரிசனம் காட்டப்பட்டுள்ளது. முப்பரிமாணம் நிறத்தின் தொனி (வர்ணபேதம்) வேறுபாடுகளுடாக கட்டியெழுப்பப்படுகின்றது.
• அளவுப் பரிமாணம் இயற்கையை ஒத்துள்ளது.
• கவர்ச்சிகரமான நிறப்பாவனை. உருவம் வர்ணத்தொனி நிலைகளினூடு கட்டியெழுப்பப் படுவதனால் நேரடியாகக் கோடுகள் காணப்படவில்லை.
• முன்னணியில் உள்ள உருவங்களின் செயற்பாடுகளுக்கு பொருந்துவதாகவும் அதற்கு வலுச் சேர்ப்பதாகவும் பின்னணியில் நிலவுருக் காட்சிகள் (தரைத்தோற்ற) (Landscape) வரையப்பட்டுள்ளன.
• மூன்று பிரிவுகளாக உள்ள ஓவியத்தில் ஒவ்வொரு பகுதியும் வேறுபட்ட மனநிலைகளை வெளிப்படுத்துகின்றன.
• முதலாவது பகுதியில் காகத்தினை துரத்தும் அகத்தியரும், 2ஆம் பகுதியில் சிறுவனாக மாறிய விநாயகரை அகத்தியர் துரத்திச் செல்கிறார் அதில் சிறுவன் கேலி செய்யும் பாங்கிலும் அகத்தியர் கோபத்திலும் சித்தரிக்கப்பட்டுள்ளது.
• மூன்றாவது காட்சியில் வந்தது விநாயகர் என உணர்ந்ததால் அகத்தியர் விநாயகரை பணிந்து வழிபடும் நிலை காட்டப்பட்டுள்ளது.
• இக்காட்சி ஒழுங்கினூடு அகத்தியரின் பணிவும் பக்திப் பரவச நிலையும் கொண்டு வரப்பட்டுள்ளது.

வள்ளியை யானை துரத்துதல்

• இவ் ஓவியமானது இணுவில் பரராசசேகரப் பிள்ளையார் கோவிலிற்குரியது.
• யானையாக வந்த விநாயகரால் துரத்தப்படும் வள்ளி சந்நியாசியாக வந்த முருகனிடம் அடைக்கலம் பெறுதல் காட்டப்பட்டுள்ளது.
• தொனி நிலை (வர்ணபேதம்) வேறுபாடுகள் ஊடாக முப்பரிமாணமும், தூரதரிசனமும் கொண்டு வரப்பட்டுள்ளது.
• சுவர் மீது தளத் தயாரிப்புக்கள் ஏதுமற்று எனாமல் வர்ணம் தீட்டப்பட்டுள்ளது.
• யானையாக வந்தது விநாயகர் என்பது குறியீட்டு ரீதியாகக் காட்டப்பட்டுள்ளது. நிறம் குறியீட்டு அர்த்தத்தில் பயன்படுத்தப்பட்டுள்ளது.
• மிகவும் பிரகாசமான நிறப் பாவனை காணப்படுகிறது.
• கோடுகளற்று ஒளி நிழற்படுத்துகை ஊடாக உருவங்கள் வரையப்பட்டுள்ளன.
• விநாயகரும் யானையும் ஒரு பகுதியிலும், வள்ளியும் சந்நியாசியும் மறுபுறத்திலும் இருப்பினும் இவ்விரு பகுதியையும் ஒன்றிணைப்பதாக நிலவுரு காணப்படுகின்றது.
• வள்ளிக்கு அச்சத்தினை ஊட்டும் வகையில் யானை சித்தரிக்கப்பட்டுள்ளது.
• படத்தில் திகிலும் அச்சமும் வெளிப்படுத்தப்பட்டுள்ளது.

பயிற்சி வினாக்கள்