கலைஞர் ஏ. மார்க்

• இருபதாம் நூற்றாண்டின் பிற்பகுதியில் நவீன கட்புலக் கலைகளின் முன்னோடியாகச் செயற்பட்ட ஒரு கலைஞராக ஏ. மார்க் முக்கியத்துவம் பெறுகின்றார்.
• 1933 இல் யாழ்ப்பாணம், குருநகரில் பிறந்து 2000 இல் உயிர்நீத்த ஏ. மார்க் ஓவியக் கலையிலும், சிற்பக் கலையிலும் திறமை காட்டிய ஒரு கலைஞராவார்.
• கொழும்பு அரச கலைக் கல்லூரியில் ஓவியக் கலைத்துறையில் உயர்கல்வி பெற்றார்.
• யாழ்ப்பாணத்தில் “விடுமுறைக்கால ஓவியக் கழகம்” எனும் பெயரில் ஒரு சங்கத்தைத் தாபித்து சித்திர வகுப்புக்களை நடத்தியதோடு, சித்திரக் காட்சிகளையும் நடத்தினார்.
• அவரது ஓவியப் படைப்புக்களின் இயல்புகளுக்கமைய அவற்றைப் பின்வருமாறு வகைப் படுத்தலாம்.

1. நிறங்களை அடிப்படையாகக் கொண்ட காலம்
2. கோடுகளை அடிப்படையாகக் கொண்ட காலம்

• நிறங்களை அடிப்படையாகக் கொண்ட காலத்தில் இருட்காலம், வெண்காலம், நீலக் காலம் (Dull Period, White Period, Blue Period) எனும் வெவ்வேறு காலங்கள் காணப் பட்டன.
• கோடுகளை அடிப்படையாகக் கொண்ட காலம் , கனவடிவவாதக் காலம் எனப்படுகிறது.
• பஸ்ரல் வர்ணம், ஒட்டுச் சித்திரம், கலப்புச்சாதனம், நீர் வர்ணம் என்பனவற்றைப் பயன் படுத்தி பொதுவாக, கடதாசியின் மேல் இவர் ஓவியங்களை வரைந்துள்ளார்.
• அவரது ஓவியப் படைப்புக்களுள்,

♦ சகுந்தலை
♦ தாண்டவம்
♦ காவடியாட்டம்
♦ ராகமாலிகை

• ஆகிய படைப்புக்கள் சிறப்பானவையாகும்.
• இவரது சிற்பப் படைப்புக்களில் கனவடிவவாதப் பண்புகளுக்கு மேலதிகமாக ஹென்ரி மூரினது தளவடிவங்களின் செல்வாக்கையும் காண முடிகின்றது. அச்செல்வாக்குகளுடன் தமக்கே உரிய நவீன பாணியில் நவீன உத்திகளைக் கையாண்டு தமது ஆக்கங்களைப் படைத்துள்ளார்.

சகுந்தலை (ஓவியம்)

• கலைஞர் ஏ. மார்க் படைத்த ஓவியங்களுள் சிறப்பிடம் பெறுவது “சகுந்தலை ” எனும் ஓவியமாகும்.
• காளிதாசரினால் புனையப்பட்ட சாகுந்தலம் காவியத்தில் பிரதான பாத்திரமாகிய சகுந்தலை இந்த ஓவியத்தின் கருப்பொருளாகக் கொள்ளப்பட்டுள்ளது.
• பஸ்ரல் ஊடகத்தைக் கொண்டு ஆக்கப்பட்டுள்ள இப்படைப்பு இயல்பான தன்மையை விஞ்சிச் சென்று, மோடிப்படுத்தல் (Abstract) சார்ந்த கலைத்துவப் பண்புகளைக் காட்டி நிற்கின்றது.
• கனவடிவவாதப் பாணியின் இயல்புகள் இப்படைப்பின் மீது செல்வாக்குச் செலுத்தியுள்ளது.
• கனவடிவவாத தளவுருவங்களும் இளநிறங்களும் இப்படைப்பாக்கத்துக்கு இருபரிமாண இயல்புகளைக் கொடுத்த போதிலும், உருவத்தைச் சூழ இடப்பட்டுள்ள தடித்த கோடுகள் காரணமாக முப்பரிமாண இயல்பு வெளிப்படுத்தப்பட்டுள்ளது.
• சித்திரத்தின் பின்னணிக்காக இடப்பட்டுள்ள வர்ணம் தளம் முழுவதிலும் பரம்பியுள்ளவாறு நீட்டப்பட்டுள்ளது.
• படைப்புக்காகப் பயன்படுத்தப்பட்டுள்ள ஒட்டுமொத்த நிறம் , தளவுருவங்கள், கோடுகள் ஆகியன மூலம் சகுந்தலையின் உள்ளார்ந்த உணர்வு வெளிப்பாடுகளைக் காட்டுவதில் கலைஞர் எடுத்துள்ள முயற்சி பாராட்டத்தக்கதாகும்.

மனிதனும் நாய்களும் (சிற்பம்)

• கலைஞர் ஏ. மார்க் படைத்துள்ள இச்சிற்பம் புதியதொரு நுட்ப முறையைக் கையாண்டு படைக்கப்பட்டுள்ளது.
• முன்னங்கால்களை உயர்த்திப் பின்னங்கால்களில் நிற்கும் நிலையில் உள்ள இரண்டு நாய்களுடன் இருக்கும் மனித உரு இந்த ஆக்கத்தில் காட்டப்பட்டுள்ளது.
• நாய்களின் உருவங்களை விடச் சிறியதாக மனிதனின் உருவம் காட்டப்பட்டுள்ளது.
• கலைஞர் ஏ. மார்க் அவருக்கே உரிய பாணியில் இச்சிற்பத்தைப் படைத்துள்ளார்.
• நவீன கலைப் பிரயோகங்களைக் கொண்ட இக்கலைப்படைப்பு மீது கனவடிவவாதக் கலைப் பண்புகளும் கலைஞர் ஹென்ரி மூரினது கலைப் படைப்புக்களின் இயல்புகள் செல்வாக்குச் செலுத்தியுள்ளன.
• இப்படைப்புக்காக சூழலில் கிடந்து பொறுக்கியெடுத்த பொருள்கள் (Found Object) அதாவது பிளாத்திக்குப் போத்தல்கள், பிளாத்திக்குக் குழாய்கள் போன்றவை பயன்படுத்தப்பட்டுள்ளன.
• நீளமான, கோறையுடைய பிளாத்திக்குப் போத்தல்களால் உருவங்கள் சந்தத்துக்கு இசைவாகவும் சமனிலையாகவும் வெளியில் உருவாக்கப்பட்டுள்ளன.
• மேலும் வெளித் துருத்திய மற்றும் உட்குழிந்த பகுதிகளுடன் இப்படைப்பு ஆக்கப்பட்டுள்ளது.
• விவரமான தன்மை குறைவான, எளிய வடிவங்களைக் கொண்ட எளிமையான வெளிப்பாடானது இக்கலைப் படைப்பின் முக்கிய பண்பாகும்.

பயிற்சி வினாக்கள்